Հայաստանի Հանրապետութեան գոյութեան սպառնացող վերջին պօլշեւիկեան խլրտումներու առթիւ, Հ. Յ. Դ. Բիւրօն երկրի Դաշնակցական մարմիններուն ուղղած է հետեւեալ շրջաբերականը:
Հ. Յ. ԴԱՇՆԱԿՑՈՒԹԵԱՆ ՄԱՐՄԻՆՆԵՐԻՆ
Ընկերնե՛ր,
Այն ժամանակ, երբ տաճիկ-ադրբէջանեան բռունցքը աւելի քան երբէք, սպառնում է հայ ժողովրդի ֆիզիքական գոյութեան, այն ժամանակ, երբ Միացեալ եւ Անկախ Հայաստանի գաղափարը իր պաշտօնական վաւերացման նախօրեակին է գտնւում, այն ժամանակ, երբ հայ աշխատաւորութիւնն անձնատուր է եղած շինարար աշխատանքի եւ ամենից աւելի կարիքն ունի ներքին եւ արտաքին անդորրութեան, մի խումբ բախտախնդիր ստահակներ դաւաճանօրէն իրենց ձեռքն են գցել Ալէքսանդրապօլում կանգնած «Վարդան Զօրավար» զրահապատ գնացքը եւ գնդացիրների եւ թնդանօթների սպառնալիքով իրենց ենթարկելով Ալէքսանդրապօլի զօրքի մի մասը՝ խռովութիւն եւ անիշխանութիւն են տարածում իրենց շուրջը: Եւ խելացնորի յիմարական արարքների հետեւանքով կանգ է առել երկաթուղին, Հայաստանի սահմանները փակել են դրսից եկող ալիւրի եւ ապրանքների առջեւ եւ երկրի աշխատաւորական կեանքը խանգարուել է ծանրապէս:
Ընկերներ, ամեն անիշխանութիւն այսօր մահացու հարւած է Հայաստանի համար: Պէտք է ամեն տեղ եւ բոլոր միջոցներով պահպանել խաղաղութիւն ու կարգը: Կառավարութիւնն արդէն ձեռք է առել կտրուկ միջոցներ զինուորական ուժով ճնշելու համար Ալէքսանդրապօլի ըմբոստութիւնը: Հարկաւոր է ամեն կերպ աջակցել կառավարութեան եւ դիւրացնել նրա աշխատանքները: Մենք բոլորովին վստահ ենք, որ Ալէքսանդրապօլում կարգը շուտով կը վերականգնուի, բայց դրանով հարցը դեռ չի կարելի համարել լուծուած: Որպէս զի ապագայում եւս նման երեւոյթներ չկրկնուեն, անհրաժեշտ է մեր զօրքն ու պաշտօնէութիւնը մաքրել հակապետական եւ սաբօդաժ անող տարրերից: Հարկաւոր է վերացնել այն պատճառները, որոնք սնուցանում են անիշխանութիւնը, ընկերներ, բօլշեւիզմը մեր երկրում երբէք յաջողութիւն չի կարող ունենալ, որովհետեւ ահյ դեմոկրատիան իր հնարաւորութեամբ հեռու է անիշխանութիւնից եւ կողմնակից է դրական աշխատանքի եւ օրինապահութեան: Սակայն նա կարող է զոհ դառնալ պրօվակատօրների, եթէ շարունակեն գոյութիւն ունենալ այն բացասական երեւոյթները, որոնցով այնքան հարուստ է մեր կեանքը: Բաւական չէ ճնշել որեւէ դժգոհութիւն, կարեւոր է վերացնել այդ դժգոհութեան պատճառները: Եւ ահա այդ կողմն է, որ պէտք է դարձած լինի մեր կառավարութեան ուշքն ու միտքը:
Ընկերներ, Ձեր ուշադրութեանն ու գործադրութեանն ենք յանձնում հետեւեալ կէտերը.
1.– Լուրջ ուշադրութիւն դարձնել կազմակերպական շարքերի կանոնաւորման եւ մաքրագործման վրայ, շահագործողն ու վատ քաղաքացին չպէտք է մեր կուսակցութեան անդամ լինին:
2.– Կառավարական միջոցներով աշխատել հեռացնել զօրքի միջից խռուիկ, հակայեղափոխական, կաշառակեր, զեղծարար, անբարեխիղճ տարրերից:
3.– Կառավարական միջոցներով աշխատել հեռացնել զօրքի միջից խռովարարարներին, զեղծարարներին ու բօլշեւիկներին: Կռուել դասալիքութեան դէմ:
4.– Կազմակերպել հրապարակային ժողովներ պրօպականդի համար եւ տարածել կուսակցական մամուլը: Երեւանի ընկերները տրամադրելի են ժողովների համար:
Ընկերներ, քանի որ Բիւրօն այսօր կառավարութեան մէջ է, կառավարութեան գործն եւս նկատեցէք որպէս կուսակցական գործ եւ նոյնքան նախանձախնդիր եղէք դէպի պաշտօնէութեան մաքրութիւնը, որքան եւ դէիպ կուսակցական շարքերը: Այս պետութիւնը կարող է կազմակերպել, ամրանալ եւ յարատեւել իբրեւ դէմօկրատիկ եւ ազատ երկիր՝ միայն Դաշնակցական ընկերների միահամուռ ջանքերով: Դաշնակցութիւնը իր բաղդը անխզելի կապերով կապել է Միացեալ եւ Անկախ Հայաստանի ճակատագրի հետ. Հայաստանի յաջողութիւնը՝ կը նշանակէ Դաշնակցութեան յաջողութիւն: Այս պէտք է գիտակցէ իւրաքանչիւր ընկեր: