ԿՈՉ. ՀՅԴ Բիւրօ. 11 Նոյեմբեր 1920
Ընկերներ:
Տաճիկները ոտքի տակ տալով զինադադարի պայմանները, վերսկսել են պատերազմական գործողութիւնները Հայաստանի դէմ:
Պարզ է, որ տաճիկները չեն կամենում հաշտութիւն կնքել մեզ հետ:
Պարզ է, որ նրանք ձգտում են վերացնել Հայաստանի անկախութիւնը, քար ու քանդ անել մեր երկիրը, կոտորել հայ ժողովրդին:
Ուրիշ ելք չկայ – պէտք է կռւել: Հայաստանի Կառավարութիւնը ամեն միջոց գործ դրեց հաշտութիւնը կնքելու, թշնամին մերժեց եւ չուզեց մեզ հետ հաշտւել: Այդ հաշտութիւնը մենք կռւով ձեռք պիտի բերենք:
Եւ այս կռւում, ինչպէս միշտ, դաշնակցականները պէտք է լինեն առաջին շարքերում: Ճառերի, ժողովների ժամանակը չէ այժմ: Պէտք է գործ: Դաշնակցութիւնը, իբրեւ գործի կուսակցութիւն, պէտք է իր բոլոր ուժերը տրամադրէ երկրի պաշտպանութեանը:
Օրւայ նշանաբանն է – ԴԷՊԻ ՃԱԿԱՏ, ԴԷՊԻ ԱՌԱՋԱՒՈՐ ԴԻՐՔԵՐԸ: Ամեն գիտակից դաշնակցական պէտք է զէնք առնէ եւ գնայ առաջաւոր դիրքերը: Դաշնակցական մտաւորականները պէտք է մտնեն զօրամասերը, ապրեն զինւորի կեանքով եւ իրենց օրինակով ու կենդանի խօսքով բարձրացնեն մեր զօրքի կազմակերպութիւնն ու ոգին:
Ընկերներ, այս օրհասական կռւում մենք կյաղթենք, եթէ կամենանք յաղթել: Դաշնակցութիւնը երբ կամեցել է, միշտ յաղթել է:
ՊԷ՛ՏՔ Է ՅԱՂԹԵՆՔ ԵՒ ԱՅՍՕՐ:
Comments