Հայրենակիցներ.
Մեր Հայրենիքի ընդարձակ մէկ մասը՝ գրեթէ ամբողջ Զանգեզուրի գաւառը՝ ենթարկուած է երկրաշարժի մեծ դժբախտութեան: Գորիս, Սիսիան, Ղափան, Արևիք, Գողթն քար ու քանդ եղած են, 51 գիւղ աւերուած, 390 մարդ սպաննուած, 7420 վիրաւոր, մօտ 10,000 անասուն կորսուած: Եւ այս դեռ առաջին, հապճեպով հաւաքուած թիւերն են: Կարելի է երեւակայել, թէ ի՜նչ ահաւոր համեմատութիւններու կը հասնի աղէտին պարզած իրական պատկերը:
Արդէն ամէն կողմէ կը լսուին օգնութեան աղաղակներ: Կը խնդրեն նիւթական օժանդակութիւն, առողջապահական նիւթեր, դեղ եւ վիրաբուժական գործիքներ, հագուստ, ճերմակեղէն, վրան: Կարիքը սուր է եւ անյետաձգելի:
Որքան որ ծանր ըլլայ արտասահմանի հայութեան ներկայ վիճակը, իբրեւ հետեւանք տնտեսական համատարած տագնապի, Հայաստանէն հասնող օգնութեան ճիչերը չեն կրնան մնալ անլսելի: Նոյն իսկ ամենահամեստ բայց ժամանակին հասցուած օգնութիւնը մեծ սփոփանք պիտի ըլլայ երկրի աղետահար ժողովուրդին համար:
Կոչ կուղղենք բոլոր հայրենակիցներուն եւ հանրային մարմիններուն արձագանգել Հայաստանից արձակուած օգնութեան աղաղակներուն:
Օգնեցէ՜ք ինչով եւ ինչպէս կարող էք: